ປະຫວັດ​ຄວາມ​ເປັນ​ມາ

ຍິນ​ດີ​ຕ້ອນຮັບ ສູ່​ ວິທະຍາໄລ​ ສຸດ​ສະກະ ​ເພື່ອ​ການ​ບໍລິຫານ ​ແລະ ​ເທັກ​ໂນ​ໂລ​ຢີ



ວິທະຍາໄລ​ ສຸດ​ສະກະ ​ເພື່ອ​ການ​ບໍລິຫານ ​ແລະ ​ເທັກ​ໂນ​ໂລ​ຢີ ​ແມ່ນ​ສະ​ຖາ​ບັນ​ການ​ສຶກສາ​ແຫ່ງ​ໜຶ່ງ​ ເຊິ່ງໄດ້​ຮັບ​ການ​ສ້າງ​ຕັ້ງ​ຂຶ້ນ​ໃນ​ວັນ​ທີ 2 ​ທັນວາ ປີ 2002 ​​ເຊິ່ງມີ​ເປົ້າ​ໝາຍ​ເພື່ອ​ຕອບ​ສະໜອງ​ໃຫ້​ແກ່​ການ​ພັດທະນາ​ຊັບພະຍາກອນ​ມະນຸດໃນ ​ສ ປ ປ ລາວ ​ເຊິ່ງ​ເປັນ​ປັດໃຈ​ສໍາຄັນ​ໃຫ້​ແກ່​ການ​ພັດທະນາ​ເສດຖະກິດ ​- ສັງຄົມ​ແຫ່ງ​ຊາດ. ວິທະຍາໄລ​ ສຸດ​ສະກະ ​ເພື່ອ​ການ​ບໍລິຫານ ​ແລະ ​ເທັກ​ໂນ​ໂລ​ຢີ ດຳ​ເນີນ​ກິດຈະການ​ໂດຍ​ອີງ​ໃສ່​​ແນວ​ຄວາມ​ຄິດ​ທີ່ ບໍ່​ຫວັງ​ຜົນ​ກຳ​ໄລສູງສຸດ (ສະໜອງການສຶກສາທີ່ມີຄຸນນະພາບສູງ ໃຫ້ແກ່ມະຫາຊົນໃນ ຕົ້ນທຶນທີ່ສົມເຫດສົມຜົນ). ວິທະຍາໄລ ສຸດສະກະ ມີ​ທີ່​ຕັ້ງ​ຢູ່​ຈຸດ​ໃຈ​ກ່າງ​ຂອງ​ນະຄອນຫຼວງ ​ວຽງ​ຈັນ ​ເຊິ່ງ​ເຮັດ​ໃຫ້ການ​ໄປມາ​ຂອງ​ນັກ​ສຶກສາມີ​ຄວາມ​ສະດວກ​ສະບາຍ.

ວິທະຍາໄລ ສຸດ​ສະກະ ​ເພື່ອ​ການ​ບໍລິຫານ ​ແລະ ​ເທັກ​ໂນ​ໂລ​ຢີ ​​ໄດ້​ຮັບ​ການ​ອະນຸຍາດ​ຈາກ​ກະຊວງ​ສຶກສາ​ທິການ​ໃຫ້​ດໍາເນີນ​ການ​ສິນ​ສອນ​ນັກ​ສຶກສາ​ໃນ​ຫຼັກສູດຊັ້ນ ​ປະລິນຍາ​ຕີ ​ແລະ ຊັ້ນ​ສູງ ​ໃນ​ສາຂາ ການ​ບໍລິຫານ​ທຸລະ​ກິດ, ການ​ບັນຊີ, ນິເທດສາດ ​ແລະ ວິທະຍາສາດ​ຄອມ​ພິວ​ເຕີ້. ນອກ​ນັ້ນ, ທະນາຄານ​ແຫ່ງ ສ ປ ປ ລາວ ຍັງ​ໄດ້​ອະນຸຍາດ​ໃຫ້​ສະ​ຖາ​ບັນ​ພວກ​ເຮົາ ​ເປັນ​ສູນ​ຝຶກ​ອົບຮົມ​ການ​ເງິນ​ຈຸ​ລະ​ພາກ.

ພາສາ​ລາວ​ແມ່ນ​ພາສາ​ທີ່​ໃຊ້​ໃນ​ການ​ສິດສອນ ​ແລະ ການບໍລິຫານ​ຂອງ​ສະ​ຖາ​ບັນ​ພວກ​ເຮົາ. ​ເຖິງ​ຢ່າງ​ໃດ​ກໍ​ຕາມ, ນັກ​ສຶກສາ​ທີ່​ບໍ່​ຮູ້​ພາສາ​ລາວ ຫຼື ມີ​ຄວາມ​ຊຳ ນານ​ດ້ານ​ພາສາ​ອັງກິດ ສາມາດ​ເຂົ້າ​ຮຽນ​ໃນ​ຫຼັກສູດ​ທີ່ສອນ​ໂດຍ​ໃຊ້​ພາສາ​ອັງກິດ. ວິທະຍາໄລ ສຸດ​ສະກະ ​ເພື່ອ​ການ​ບໍລິຫານ ​ແລະ ​ເທັກ​ໂນ​ໂລ​ຢີ ​ແມ່ນບອນ​ທໍາອິດ​ ​ທີ່​​​ໄດ້​ຮັບ​ການ​ຮັບຮອງ​ຈາກ​ອົງການ​ສອບ​ເສັງ​ທຽບ​ລະດັບ​ພາສາ​ອັງກິດ​ຂອງ ​ສະຫະລັດ​ອາ​ເມ​ລິ​ກາ ​ໃຫ້​ດໍາ​ເນີນ​ການ​ສອບ​ເສັງ​ທຽບ​ລະດັບ​ພາສາ​ອັງກິດ TOEFL® iBT ໃນ ສ ປ ປ ລາວ ​ໃນ​ເດືອນ 7 ປີ 2006 ​ແລະ ​ໄດ້​ຈັດການ​ສອບ ​ເສັງ​ຄັ້ງ​ທໍາ​ອິດ​ໃນ ສ ປ ປ ລາວ ​ໃນ​ເດືອນ 8 ປີ 2006.

ນັກ​ສຶກສາ​ທີ່​ຈົບ​ການ​ສຶກສາ​ຈາກ​ວິທະຍາໄລ​ພວກ​ເຮົາ ບໍ່​ພຽງ​ແຕ່​ຈະ​ມີ​ຄວາມ​ຮູ້​ດ້ານ​ວິຊາ​ການທີ່​ຕົນ​ສຶກສາ ​ເທົ່າ​ນັ້ນ ​ແຕ່​ຍັງ​ມີ​ຄວາມ​ຮູ້ ​ແລະ ທັກ​ສະດ້ານ​ການ​ເປັນ​ຜູ້ນຳ, ຄວາມ​ສາມາດ​ດ້ານ​ການ​ສື່ສານ​ກັບ​ບຸກຄົນ​ ອື່ນ, ​ແນວ​ຄວາມ​ຄິດ​ສ້າງສັນ, ຮັບຜິດຊອບ​ຕໍ່​ສັງຄົມ ແລະ ມີ​ຄວາມກະຕືລື​ລົ້ນ​ຫ້າວຫັນ. ຄຸນ​​ສົມບັດ​ທີ່​ ດີ​ເລົ່າ​ນີ້ ​ແມ່ນ​ໄດ້​ຮັບ​ການ​ປູກຝັງ​ໂດຍ​ຜ່ານ​ວັດທະນະທໍາ​​ອົງການຂອງ​ພວກ​ເຮົາທີ່​ນັກ​ສຶກສາມີ​ຄວາມ​ໃກ້ ຊິດຕິດ​ແທດ​ໃນ​ແຕ່​ລະ​ວັນ ​ແລະ ຜ່ານ​ກິດຈະກຳ​ນອກ​ຫຼັກສູດ​ຕ່າງໆ​ຂອງ​ພວກ​ເຮົາ. ນັກ​ສຶກສາຂອງວິທະ ຍາໄລ​ພວກ​ເຮົາ ຈະ​ໄດ້​ຮັບ​ການ​ຊຸກຍູ້​ໃຫ້​ເຂົ້າ​ຮ່ວມ​ກິດຈະກຳ​ຕ່າງໆ​ຂອງ​ວິທະຍາໄລ ​​ໂດຍ​ອີງ​ຕາມ​ຄວາມ​ມັກ ​ແລະ ຄວາມ​ທະ​ນັດ​ຂອງ​ນັກ​ສຶກສາ​ແຕ່ລະຄົນ. ດ້ວຍ​ວິທີ​ນີ້, ​ພວກ​ເຮົາ​ສາມາດ​ຂຸດຄົ້ນ​ເອົາຄວາມ​ສະມາດ​ສະ ​ເພາະ​ຂອງ​ນັກ​ສຶກສາ​ແຕ່ລະຄົນ​ອອກ​ມາ​ໄດ້​ ​ເຊິ່ງຄວາມ​ສາມາດ​ສະ​ເພາະ​ນັ້ນ​ຈະ​ຊ່ວຍ​ໃຫ້​ນັກ​ສຶກສາ​ປະສົບ ​ຜົນສໍາ​ເລັດ​ໃນ​ອະນາຄົດ​ໄດ້. ພວກ​ເຮົາ​ໄດ້​ມີ​ການ​ຈັດ​ກຸ່ມ​ ​ແລະ ທີ​ມກິລາ​ປະ​ເພດຕ່າງໆ​ໃຫ້​ນັກ​ສຶກສາ.

ສັນຍາ​ລັກ​ຂອງ​ວິທະຍາໄລ


ສັນຍາ​ລັກ​ຂອງ​ ວິທະຍາໄລ​ ສຸດ​ສະກະ ​ເພື່ອ​ການ​ບໍລິຫານ ​ແລະ ​ເທັກ​ໂນ​ໂລ​ຢີ ​​ແມ່ນການ​ປະສົມປະສານ​ກັນ​ລະຫວ່າງສິນລະປະ​​ແບບ​ລາຍ​ລາວ, ​ແບບ​ຕະ​ເວັນ​ອອກ ​ແລະ ຕະ​ເວັນ​ຕົກ. ສິນລະປະ​​ແບບ​ລາຍ​ລາວ ທີ່​ຖານ​ຂອງ​ສັນຍາ​ລັກ ໝາຍ​ເຖິງ​ແນວ​ຄວາມ​ຄິດ ​ແລະ ວັດທະນະທຳ​ລາວ​ທີ່​ມີ​ຄວາມ ​ງົດ​ງາມເຊິ່ງ​ເປັນ​ຮາກຖານຂອງ​ແນວ​ຄວາມ​ຄິດ ​ແລະ ປັດ​ຊະ​ຍາ​ຂອງ​ເຮົາ. ສິນລະປະແບບລາຍ​ຕະ​ເວັນ​ອອກ ​ແລະ ຕະ​ເວັນ​ຕົກທີ່​ດ້ານ​ຂວາ​​ເບື້ອງ​ເທິງ​ ແລະ ​ເບື້ອງລຸ່ມ ຂອງ​ສັນຍາ​ລັກ ສະ​ແດງ​ເຖິງ​ແນວ​ຄວາມ​ຄິດ ແລະ ເທັກໂນໂລຢີທີ່​ກ້າວໜ້າຂອງຕະ​ເວັນ​ອອກ ​ແລະ ຕະ​ເວັນ​ຕົກ​ ​ເຊິ່ງປະກອບ​ເປັນ ​ສ່ວນ​ໜຶ່ງ​ຂອງ​ແນວ ​ຄວາມ​ຄິດ​ຂອງ​ພວກ​ເຮົາ.

ສີຟ້າ​​ຂອງ​ສັນຍາ​ລັກ​​ ແມ່ນ​ສີ​​ທີ່ສະແດງເຖິງຄວາມ​ໄຝ່ຝັນ, ຄວາມ​ຈິ່ງ​ໃຈ ​ແລະ ຊື່ສັດ. ສ່ວນ​ສີ​ເທົ່າ ​ແມ່ນ​ສີ​ແຫ່ງ​ຄວາມປອດ​ໄພ, ຄວາມ​ເຕີບ​ໃຫຍ່, ຄວາມ ​ເຊື່ອ​ຖື​ໄດ້ ​ແລະ ການ​ໃຫ້. ຄຸນ​ລັກ​ສະນະ​ເລົ່າ​ນີ້​ແມ່ນ​ຖືກ​ປູກຝັງ​ໄວ້​ໃນ​ແນວ​ຄວາມ​ຄິດ ​ແລະ ການ​ປະຕິບັດ​ງານ​ຂອງພວກ​ເຮົາ.

ສັນຍາ​ລັກ​ທີ່​ມີ​ລັກ​ຊະນະ​ເປັນ​ວົງ​ລໍ້​ ສະແດງເຖິງ​ພາຫະນະ​ທີ່​ນໍາພາ​ນັກ​ສຶກສາ​ໄປ​ສູ່​ຄວາມ​ຮູ້​ ເຊິ່ງຈະສ້າງ​ອານຸພາບ​ໃຫ້​ແກ່​ນັກ​ສຶກສາ ​ໃຫ້​ສາມາດ​ໄປ​ປະຕິບັດ ພາລະກິດທີ່ຕົນໄຝຝັນໄດ້ຢ່າງສໍາເລັດ​ຜົນ

  • ຕູ້ ປ.ນ 390, ຖະໜົນ ໂພນພະເນົາ - ໂພນຕ້ອງ, ບ້ານ ໂພນພະເນົາ ເມືອງ ໄຊທານີ, ນະຄອນຫຼວງວຽງຈັນ, ສ.ປ.ປ ລາວ
  • (+856-21) 900 337, 261 140    ແຟັກ:  (+856-21) 900 338, 261 141 ອີເມວ: [email protected] Facebook Youtube

Copyright © 2012 Soutsaka College. All rights reserved. Last Update: 25 Nov 2016

website creator free